Wha wrang can’t be right
August 11, 2015 | By KNews | Filed Under Dem Boys Seh, Features / Columnists, News, Source
Is always a problem when some people get a job and then dem don’t seem to have nutten to do. That is when dem does get involve in other people business. When Jagdeo stop being president he get involve in Donald business till he tek over de man wuk.
De same thing happening now. A Minister gone to head a Board like if he ain’t got nutten to do. De same Jordan got to handle de finances of de country, check pun all who tekking money to go overseas and not bringing back a receipt, who hustling GRA and trying to dodge taxes, and yet he got time to go and sit pun de NICIL Board as de Chairman.
De Pee Pee Pee didn’t mek he get away with that. Right away Rohee put out a statement and tell de whole country how wha Jordan do was wrang. Rohee seh that Ministers should not sit pun any Board and he right.
But dem boys also want to know if he didn’t know that fuh 23 years. He see Ash Knee sitting pun de same NICIL Board and he nor de whole Pee Pee Pee didn’t seh nutten. In fact Hap New criticize that action till who coulda tun blue get blue in de face. Jagdeo refuse to listen to dem just like when dem boys ask him if he gun put de Lotto Funds into de Consolidated Fund and he seh no.
De Good Book seh that there is none suh blind that he can’t see he own mistake. And de other book seh that there is none suh stupid as to see de mistake wha somebody mek and go and mek de same mistake.
If Hap New criticise de appointment then how come dem do de same thing. It look like dem playing follow pattern wid de Pee Pee Pee, but dem boys want dem to know that wha miss de Pee Pee Pee wouldn’t pass dem.
De Anamayah man from Berbice already start put licks pun Hap New Hay Heff See. He claim how no Berbician ain’t get no space in de government suh he lef de party. He wuk hard and he feel a kind of a way.
Uncle Glenn and Uncle Adam sorry fuh he and dem lef too, although dem never join. Dem sympathise wid Anamayah, and if he come back then Uncle Glenn and Uncle Adam gun come back. Of course, if Jagdeo can come back, who more can’t come back.
Talk half and don’t do wha de Pee Pee Pee do, because de last days gun be wuss than de first.