Soulja Bai Govt fall fuh a weekend of promise
Mar 20, 2018 , https://www.kaieteurnewsonline...-weekend-of-promise/
Tek whatever you can from life because when life start to tek from you, it gun tek even you last breath. Dis is de reality of life.
Those are de words from dem oil companies in Guyana. All of dem who sign dem contract wid dis Govt tell Soulja Bai and ee team dat dem better tek wha dem can get now.
Is like a woman telling she friend to tek wha she can get when suddenly she phone ring. Dem boys hear when she seh ‘Hello’. She want impress she friend and she put de phone pun speaker.
Dem boys hear de man seh, “My love, how you doing?”
She seh, “I’m fine.”
De guy seh, “Will you be free during dis weekend? And can you come to my house dis weekend?”
De gyal seh, ‘I am sorry, I can’t mek it. I will be attending me Auntie wedding. And de next day I am busy. I am so-o-o occupied.”
De guy seh, “O-oh; OK, I was just planning to take you out to shop, and surprise you wid an I-phone X, ‘256 GB jet black’. Then get you a few dresses, Louis Vuitton shoes you have been asking for.”
Right away after hearing dat, de gyal respond, “I’ll be coming and I will even spend de whole weekend there, my love.”
De guy ask she “What about de wedding???”
“I was only joking.”
De guy seh, “Me too.”
Dem boys want know who promise Guyana what, and who mekking dis kind-a joke wid Guyana’s wealth. Dem boys just want odda people to know dat is de people of Guyana who own de wealth; and dis thing call “honesty is an expensive gift. Don’t expect it from cheap people.”
Talk half and hold on to you last breath before dem oil companies carry dat away, too.