Shame on Guyana MPs
Dec 05, 2018 , Kaieteur News, https://www.kaieteurnewsonline...shame-on-guyana-mps/
A man tell dem boys de one thing dat people have dat nobody else has is YOU. Your voice, your mind, your story, your vision. If voters did use dem things wha de Man Above give each dem and vote, dem woulda never end up wid de kind of people dem have in Parliament.
Yesterday, de Speaker in de Parliament had to beg dem MPs to raise de level of de budget debate. Monday when de debate start, Neil Kumar decide to talk ‘bout Jagdeo wedding during de Budge debate.
He seh marriage expensive, how man does go way and lef woman and he talk ‘bout divorce. He talk ‘bout child mudda and child fadda.
Ganga seh how dem mekking dem roads too smooth. He seh he and he wife shoes does slide when dem walk on de new road.
Charrandas is de odda one. He bring he neighbor story to Parliament. He tell de speaker and de MPS dat ee neighbor go pon TV to complain how he get lay off and now he can’t afford to feed ee children dem. De man was crying wid snot pon TV.
Charrandas seh he know de man don’t have no children, not even a cat or a dog he adopt in ee yard.
Keith Scott try to read he budget speech and de Speaker tell him to sit down because he was picking corn. Up come Priya and she decide she gon show de whole world de ignorance, de doltishness and incompetence of de Guyanese politicians.
She don’t see sheself pon de TV no more and in de newspaper. She decide to do like de Guyanese Critic and broadcast sheself.
All dis went on in Parliament dat mek de Speaker hold he head and down it. He tell dem boys, he couldn’t believe what he was seeing and hearing coming from de mouth of representatives of de people.
He tell dem boys, he suh shame dat Monday dat he talk privately and send dem home early, hoping dat dem gon come better and wid a change attitude de next day. Instead, de man seh dem come wuss than Monday.
Dat is wha force him to come public. He seh if dis continue today, he gon shy all of dem out de place.
Dem boys upset when dem hear dat. Dem seh de MPs are de leaders of dis country and dem should lead by example. Dem boys seh if dat is de example dem setting, then God be wid de nation.
Talk half and wait fuh see wha happen today.