Police refuse to breathalyse dem colleague
Nov 20, 2018 , Kaieteur News, https://www.kaieteurnewsonline...alyse-dem-colleague/
This is de season fuh dem Christmas Blow Blow. From de time SOCU announce that it got 19 charges to clap pun Irfaat, everybody holler how de Christmas Blow Blow sounding.
SOCU charge nuff people and to this day it can’t even get one conviction. It charge Jenny West and spend a lot of money pun special prosecutor. De Magistrate tell SOCU that it didn’t have a case.
SOCU charge Brassington and Ashni. Dem two men smiling because SOCU can’t even get dem to appear in court to answer de charge.
De same SOCU putting out one and two press release to mek it look like dem wukking but de truth is that nutten ain’t happen.
When dem haul in Jagdeo and Luncheon, people believe de country woulda get some justice. To this day nutten ain’t come out of that.
Luncheon planning to sue SOCU fuh wrongful arrest and Luncheon planning to sue for unnecessary torture.
And if SOCU is a Christmas Blow Blow, de police at Vreed-en-Hoop is de damp squib. Dem boys now understand why nobody don’t respect de police.
One of dem drunk and crash wid a car. He get up and start to behave disorderly. Everybody see how he was speeding and wobbling.
De man pick up de police and carry him to Best Hospital. De doctor seh de policeman look like if he drunk. A nurse seh de same thing, but dem odda police refuse to breathalyse him.
All de driver asking dem fuh do is leh he blow in de machine. De police still refuse. Things get sweet when a reporter ask de station head why dem don’t test he breath.
By this time de policeman gone home and try to sober up. When he come back he still drunk but Inspector Craig seh how he inspect de rank and he ain’t smell no likker so he would not do de breathalyzer. He didn’t stop to think if de man smoke up.
Then de same inspector tun round and lock up de driver. Is this type of action, dem boys seh, does mek people lose respect fuh de police.
Last night a murder suspect came to Kaieteur News building just to surrender to reporters. He tell dem he frighten fuh go to de police station because dem gun beat him up.
He had no marks pun he skin when dem boys hand him over to de police.
Talk half and hope he don’t end up in court wid he eye swell and wid marks about he body.