Nuff people controlling
Jan 31, 2017 , http://www.kaieteurnewsonline....-people-controlling/
When you give a li’l boy a tool that big man does handle, you bound to get trouble. Nuff li’l boy tek dem parents car and go fuh a joyride. De next thing you know is dem crash and kill demself. Sane people does avoid putting gun in li’l boy hand. Is only dem terrorist and dem guerrilla does tek children and put gun in dem hand.
De American people know these things and dem put power in Trump hand. Dem boys never see one man cause so much confusion. Trump put de whole world in crisis. Things get to the stage wheh some of dem country begin to wonder if dem dealing wid de same America dem use to know.
He didn’t even sit down in de chair when he announce that all dem Ambassador got to clear dem desk de next day. Dem Ambassador still laughing. He tell dem same ambassador not to give visas to certain people. Dem listen to him and cause so much problems that up to now some planes can’t even fly.
From de time Trump get elected dem boys know was trouble. Normally, all dem countries does send congratulations message. Trump congratulations message come in slow like nobody didn’t want to send any. Now dem boys know why.
Parliament meet yesterday. Dem boys know that whenever Parliament meet is because de MPs ain’t got nutten to seh. Couple times Soulja Bai go to help out. He mek a speech and then de parliament had to send couple sessions to discuss it.
Yesterday, was nuff talking. De people didn’t have nutten new to talk but dem keep talking. De opposition talk bout Soulja Bai and he team like to control. But is de same thing Rum Jattan use to seh when he use to sit down when Soulja Bai people now sitting.
Now dem boys want to know if is everybody want to control. Trump want control who travel to the country; De Speaker of de House controlling who must talk in Parliament; and de parking meter people controlling wha people pay. Dem charging more VAT than even de government. But that is another story.
Talk half and brace fuh de problems.