Jagdeo mek Soulja Bai swear in dem judges
May 17, 2017 , http://www.kaieteurnewsonline....swear-in-dem-judges/
Jagdeo is a man who don’t drink or smoke, but de other day he tell dem reporters that he prepared to legalize hemp. Hemp is a crop that dem use to mek rope, but it is a drug that does give you a good high like ganja.
Dem boys seh that Jagdeo had to try it Monday morning, because he not only look high when he meet wid de media, he also seh he would legalise hemp and if people get him vex he would legalise ganja. But that is only a promise and everybody know that Jagdeo don’t keep promise.
When people remind him he does get vex. That is why he hate de Waterfalls paper wid a vengeance. Dem boys does always remind him of de promises he mek. He did promise to legalise same-sex union. He mek people go to parliament and vote, but when de time come he refuse to assent to it. He own people seh he got dem wasting time. Wha dem same people didn’t know was that de vote in Parliament was a distraction.
But he serve he purpose. He mek Soulja Bai run and swear in dem judges. Soulja Bai had de names, but he was playing bassa bassa. Jagdeo tell de Chat-3 who call de media. Dem boys seh you can run but you can’t hide. Is more judge in de system.
But while he swearing in judges, he got people who reporting bout de goodness of others. Some people think dem police hand to mouth, suh dem offering bribe. One man go wid half a million dollar because de police hold he son wid a gun and nuff ammo. Dem boys seh if he didn’t get bail de two of dem woulda end up hugging up in de same cell in Camp Street.
Another one had he sister who get ketch and decide that he gun bribe de cop wid money. If he had sense he would bride de man wid he sister.
Talk half and watch how things suddenly moving.