Dem boys seh…Holiday season suh bad that Rum Jattan extend drunkeness
Christmas come and gone. This year wasn’t as nice as de previous years and it ain’t got nutten to do wid de new coalition govt. Is just that everything bad was happening to Guyana and now everything crash land on Guyana.
Venezuela shut down rice and Jagdeo never tell anybody. Gold wha use to keep people nose above water drop tremendously. Sugar ain’t doing nutten but draining de treasury.
De Marriott wha gun bring home money tekking money from all round. De GTT shares wha use to bring in US$3 million a year, Jagdeo and Brassington sell it out and de people still owe this country.
De main thing, drugs, and dem boys ain’t talking bout wha Babbie does bring in—that gone pun de backburner. De new Hambassadah put a clamp pun all of dem and locking dem up since dem step out of Guyana. Drug money stop coming in like how it use to come in durra durra.
Things fall so hard that even Kwame loss he house in Diamond. De bank fall down pun him.
This is only some of de things that fall. Christmas dry up this year. Then Soulja Bai screw up de Joint Services. Dem accustom getting a month salary. Soulja Bai change it to a flat $50,000 across de board. Some of dem use to get $100,000 and some get up to $300,000. Dem tek home $50,000.
Dem boys hear plenty Joint Services people really vex. Dem wives more vex. That money wha dem get can barely do dem hair. Dem had to lef out dem toe nail and finger nail.
But dem other public servants was more than happy because dem always use to get 3% and 5%.
Dem use to get less. If dem wukking fuh $100,000 and dem get 5% dem would get $5,000 a month. And if it retroactive dem use $60,000 but dem had to pay tax suh dem use to end up wid $40,000.
And if you salary was $50,000 and you get that same 5% you would end up wid $30,000 and when de tax come out you end up, according to Brassington Maths, wid $1,000.
Even Rum Jattan see that things suh bad that rum shop use to close up at 9:00 o’clock when dem suppose to close at 2;00 am. Night club use to close at 2:00. He extend de night life. He really extend drunkenness, lawlessness and sexiness. He seh dem can close whenever dem want and dem can put on whatever clothes dem want.
Dem boys watching de budget to see wha coming up.
Talk half and tell Brassington to give back y’all money.