Skip to main content

FM
Former Member

Donald Dumb hide behind plant pot to sing karaoke

August 15, 2015 | By | Filed Under Dem Boys Seh, Features / Columnists, News, Source

 

People does only hide when dem do something bad. Criminals does hide and children who do something and dem parents vex wid dem does run and hide. If a dog thief and he know de owner gun buss he tail he does run and hide.


That is why people couldn’t understand why Donald Dumb had to hide de other day. He tun up at Sleep Out fuh karaoke as he does normally do. He had a cap pull down in he face. A security man carry de mike fuh he. He tek de mike and he start sing. People couldn’t see who singing. Donald was hiding behind a plant pot, but a visitor recognize de voice. He ask he partner why Donald hiding and he partner couldn’t answer.


Suh de man shout out, “Why are you hiding?”


When Donald buss de second tune de visitor from England shout out again. “Why are you hiding? I didn’t know that you did something wrong.” Donald pull down he cap over he eye and push out he head like a snake out of a barrel, and sing out de song. When he done he hand de mike to de security and walk out through some back entrance.


Donald ain’t got no reason to hide. He not like Jagdeo, Luncheon and Ash Knee. De three of dem do nuff wrang thing. Dem boys remember wha dem do when Soulja Bai people announce that dem gun provide better seating fuh dem old age pensioner.


When Luncheon build de $69 million NIS building pun de Corentyne he claim how it got better seating. He spend $7 million to build de roof alone. He seh that de rest went to provide seating. When dem boys check out de seat, dem see some school bench. Somebody put some mango leaf and spread a plastic over dem leaf.


Dem boys know that Luncheon already collecting he old age pension and when de time come fuh Jagdeo and Ash Knee collect dem own de state intend to provide proper seating fuh dem. De seats gun have spikes.


Dem boys also watching to see if dem really get a change or an exchange.

 

Jagdeo government use seating fuh thief money. This team ain’t gun get that chance fuh thief. Dem can’t even build a toilet seat without examination. But is Donald who got people worrying.


Talk half and shame on you Donald.

Add Reply

×
×
×
×
×
Link copied to your clipboard.
×
×