Skip to main content

FM
Former Member
Dem boys seh….Life really strange

September 26, 2011 | By KNews | Filed Under Dem Boys Seh, Features / Columnists, News
Source - Kaieteur News

Life can play some funny tricks pun people. Tek cricket. Dem boys watch de game between West Indies and England de other day and dem realize that West Indies got nuff schoolboys, that dem don’t have a team. Dem bat and England mek dem look like some old lady going to de supermarket.

Everybody vex. But some people like punishment suh dem decide fuh watch de second game. Before dem know it dem get more vex because de team just can’t bat. Normally people does mek at least 140 in a game like that. West Indies mek 113.

If people don’t believe that de Man above playing wid dem mind then something wrang. West Indies win de match. De same English people who beat dem suh bad couldn’t even mek 100. Dem mek 88.

Now that gun encourage people fuh watch West Indies again but things like that does give people heart attack because dem gun expect more miracle.

Miracle mek dem get nuff news bout de $69 million NIS building. Somebody call de manager duck-and-run and she get vex. That is how dem boys hear that instead of a new roof somebody patch a few zinc sheets and charge a whole heap of money.

Is de same miracle mek de PNC stay away from parliament and mek de Speaker report that when dem stay away de government does tek extra money without accountability.

But dem boys seh that whether de PNC deh or it ain’t deh is de same way de government tekking money. De only difference is that dem gun claim that de PNC see when dem tek it.
Life does play nuff tricks.

Talk half. Lef half.

Add Reply

×
×
×
×
×
Link copied to your clipboard.
×
×