De budget cater fuh Jagdeo and he friends
Nov 27, 2018 , Kaieteur News, https://www.kaieteurnewsonline...gdeo-and-he-friends/
De Finance Minister present de 2019 budget yesterday and it got something fuh everybody. It ain’t got a day dat Jagdeo ain’t complaining bout de economy. Dem boys notice dat de Finance Minister remove all de taxes and duty from poison and pesticides.
Dat mek it easy fuh Jagdeo and all he friends who complaining, to buy poison and ease dem worries. De police and de firemen also got worries. Dem and all can buy poison cheap.
Guyana now got a reputation dat if something ain’t nail down some people who wearing uniform gon move it. De army find dis out a long time ago. During de time when Jagdeo was President, some soldiers move off wid 33 AK47 rifle.
Dem guns cause de army nuff trouble because dat was de time of de crime wave. Dem was de days when every criminal wanted a gun. De army search and find some of dem guns but to dis day some of dem guns still missing.
Dem had cocaine in a policeman office. Dis was no ordinary policeman but by de time de court was ready for it, de cocaine disappear from de man office and nobody don’t know wheh it deh to dis day.
Dem boys know dat dis ting ain’t start happening today. A gang raid a man gold camp; de police chase and ketch dem and get back de man diamonds. Dem send de diamonds to dem boss in de city. When de owner start to look fuh he diamonds, he hear it disappear.
Is years now and he still can’t get he diamonds. He go to court and all he hearing is people singing how is not dem.
Dem boys hear nuff odda story. Dem had a fire at de Crime Chief house and when de blaze out, de man phone disappear. Is a good thing somebody call de number and hear it ringing inside de fire tender.
Dem boys don’t want talk about de plane crash and dem fast finger firemen who mek de whole country shame. Dem firemen pick up everything dat wasn’t bolt down. Is only because de pilot miss he phone soon after he come out de plane dat people realize dat things was disappearing from de plane.
De whole country shame; everybody still talking bout dat. People believe dat others gon tek note and be on dem Ps and Qs. De talk still going on but dat didn’t stop two policemen from thiefing out de model planes at de Civil AVIATION Conference.
Everybody know is Christmas and some big men always want plaything.
De conference people now saying, “Thank God fuh cameras.” De same policemen in de band thief de planes.
Talk half and direct Jagdeo to de budget!