Dem boys seh…Bharrat tie up Donald

Nuff thing tie up and A kneel Ganda Ball tie up nuff things. He now trying fuh tie up de courts wid some motion against Parliament. De last time he try, de Chief Justice tell he that wha happen in Parliament is parliament business and that he shouldn’t bring it to de court.
Dem boys seh that it look like he ain’t hear because he gone again trying to tie up de court.

This was de same man who tie up de house deal when Bharrat sell he house to some man from Trinidad. Was de same A kneel Ganda Ball who tell de world that Bharrat didn’t have money when he tun president. But when he done, Ganda Ball tie up, till he tie up nuff people. But one day he gun get tie up like guana.
Bharrat tie up nuff thing too. He and Brazzy tie up de Amaila Falls deal, he tie up de airport expansion project, he tie up de Marriott, and he help Fip tie up de whole country. Fip is now a millionaire and he glad things get tie up.

Dem boys seh that everybody tie up poor Donald till he don’t know he head from he tail. Today is one year since Uncle Donald tie up de Presidency and it look like if de presidency tie he up. He ain’t do nutten and dem boys seh that is because he tie up.
Bharrat go suh far as to tie up de Pee Pee Pee. He is now de chief cook and bottle washer in de party and poor Donald ain’t got a say. De man tie up de place suh till he firing people and hiring he kavakamites. And all this happen in one year.
Brazzy tie up de IDB and NICIL. Dem boys seh that he tie up NICIL suh tight that even de country can’t get no money out of it. But he too gun tie up he self. Is only time.
Talk half and wait fuh dem tie up demself