Thief man seh he money come from Pradoville2

Dem boys hear that de man claim how is he father give him de money.

At one time when he seh suh, people believe that he father was a rich man. When dem check, de man father is an ordinary man who got to hustle to put food on de table.

That is when de crook tell dem how he father win two daily millions. It got to be that de father give two wrong names because de lotto people seh that de name that call never win de Daily Millions.

De next thing that had de man thinking quick as how de money get wet.

Dem boys hear how he cry over it. Well he had to cry more than Rainstorm, de ghirl in de Nelson West Indian Readers.

Dem boys know that when a man get ketch he does always find somebody to blame. De bandit tell dem Police that he learn from Jagdeo, that Scamp.  De Police ask he wha he mean? He tell dem that he hide de tiefing money in watah because he see Jagdeo buy watah-front property wid money that people not sure how he get it. And is nuff, nuff money.

De man seh that Jagdeo need a whole ocean fuh hide all ee money.

Now, dem boys hear that nuff people planning to tek up under-watah diving near Jagdeo property because dem boys sure that money deh in de water. No bank can’t tek it because of money laundering, and dem can’t hide in a foreign country without Uncle Sam knowing wha happening.

Now people understand Pradoville. Jagdeo buy Ocean-side property fuh hide money.

Then, it gat a fisherman and he family wha get rob.  De Fisherman blame de government fuh not giving he a gun but dem boys want remind he that even if he had a gun, he wasn’t gon be able fuh do anything in dis instance because he wasn’t there when dem get rob. 

People does come up wid de stupidess excuse.

Talk half and don’t use Daily Millions as an excuse