Skip to main content

FM
Former Member

Guyanese want to smile li’l bit

Feb 23, 2018 Dem Boys Seh, Features / Columnists, https://www.kaieteurnewsonline...nt-to-smile-lil-bit/

Guyana always had a case of resources. Everybody know how de resources nuff but de country never had money to develop any of dem.

People come from de islands and dem do very well because dem wuk hard. Then de foreigners come. Dem had more money and technology.

Is then de problem start.

Dem boys know that de foreigners come wid dem money and sign contract because dem claim that dem don’t want no government shaft dem. But dem want to shaft de government. Nuff of dem do that.

Is that attitude mek Burnham tell nuff of dem to lef de resource and another generation can always try to wuk it. De sad part is that sometimes it does tek fifty years fuh anybody look at de resource again.

That happen wid manganese.

Dem boys always use to wonder how all dem country round Guyana got oil and Guyana ain’t got none. Dem old people always use to seh that one day somebody gun find oil.

Well Guyana find oil, but is better if dem didn’t find any because is madness. De thing confusing. De government seh de country gun get rich; people seh de government ain’t cut a good deal and de country getting rob and dem got another set who seh all this gun done just now because people gun run and lef oil.

Dem boys remember when Omai come to invest in gold. Things was nice because de gold price keep going up. But dem boys know wha go up does come down. De gold price come down and Omai pack up and lef all dem machinery.

De same thing wid oil. De price start to go up and all over de world people start fuh pump more and things like that. Then de price fall.

Guyana find oil when de price going up again but de time coming when de oil ain’t gun worth nutten, because people gun be using other things.

That is why dem boys vex wid de oil company fuh shafting dem. Dem know that Guyana will not get a chance to get like Saudi Arabia and Kuwait.

Suh de people seh that since time limited, don’t rob Guyanese. Check that deal again, because people want to smile all de time.

Talk half and don’t mek dem boys wash dem mouth pun you.

Replies sorted oldest to newest

Add Reply

×
×
×
×
×
Link copied to your clipboard.
×
×