Somebody want get rid of Donald
From de time he put he signature to de constitutional amendment everybody know that Jagdeo regret it. He been good as President. He didn’t have to answer to nobody; he didn’t have to pay fuh nutten and he coulda get whatever he want wid a phone call.
People see that and know that once he did sit down too long de country woulda get a monster. He woulda pass order like Deng Xiao Peng or like Adolph Hitler.
Is he own people put in that clause that no president can stand fuh reelection more than once because dem did want to get a chance to become president. Dem did also want fuh get rid of he. But Jagdeo still had a trick. He believe that in a few years he woulda get people fuh change dem mind and revamp de constitution. That ain’t happen till now.
He get a man name Richardson fuh get two lawyer fuh challenge he own signature. Then he come up wid an idea. He get Anil fuh challenge de very constitution he swear to defend. Anil call two lawyer and tell dem that Jagdeo got money fuh pay dem good and if dem get a judge fuh change back de constitution then he gun mek one prime minister and de other head of de Central Bank.
Dem file de challenge and dem waiting. Jagdeo was smart. He lef de country suh nobody coulda seh that is he tell dem fuh do it but dem boys know that in this day and age you can deh pun de moon and give instructions.
De problem is which judge gun tek on de case. Chang seh that he fed up getting cuss fuh Jagdeo suh he gun give somebody who can tek cuss and don’t even care.
Already Anil telling some people that de term limit is unconstitutional, that it denying a man he right to do wha he want.
Well, dem boys seh that this challenge gun prove how bad Jagdeo want de presidency.
Talk half and wait fuh de change.