Donald and Sam refuse to follow Jagdeo
There is more in de mortar than in de pestle. De walkout was not because dem didn’t get seats. Seat was never a problem. Dem boys know dem go to D’Urban Park premeditate to create a stir.
De people tell dem come one time, dem want come dem own time. De people tell dem use one entrance, dem go till round de other side to use another one.
De people also tell dem that seats fuh de ex-presidents and dem wife will be available in de presidential box. Donald Dumb walk wid he wife; Sam Blinds carry he wan; Jagdeo grab Ten Edghill and walk in.
De Chat-3, Rohee and de rest of de kavakamites end up going in de same stand when de people arrange fuh dem to be in another stand. There was no more seat in Soulja Bai stand to accommodate all of dem so they were left standing.
De Minister saw dem and she ask other invited VIP guests who she know to get up just to allow de kavakamites to sit. When dem realize that dem gun get seats and can’t mek story, suddenly Ali Baba jump up and shout “Let’s go. Dem embarrassing us.” De few chores that was standing walk out wid him, skinning dem teeth as dem walking out.
De other two ex Presidents, Blind and Dumb, remain sitting wid dem wives throughout de programme.
Dem boys seh why de two of dem lef sitting is that de blind one couldn’t see de walk out, and de dumb one who see de walk out, couldn’t tell de blind one wha going on.
Dem boys always tell de nation that Jagdeo is unhealthy fuh Guyana. He don’t mean good except is fuh he own self.
If he can mek dem same people go in de American Hambassada house and cuss de man from head to toe wha more he wouldn’t do.
Is a good thing nobody see when dem walkout, not that anybody did care anyhow. Dem boys glad because if dem did sit down too long dem woulda give away or sell out de whole D’Urban Park knowing what they did to de mining sector, the forestry sector de housing sector and everything dem had control over.
Talk half and dem boys happy wid de walk out
